Allt að 30 metrar á sekúndu í suðaustan stormi

Veðurstofan varar við suðaustan hvassviðri eða stormi á höfuðborgarsvæðinu, Suðurlandi, Faxaflóa go Breiðafirði frá klukkan 13 í dag og fram undir miðnætti.

Er gul viðvörun í gildi og segir á vef Veðurstofunnar að veðrið verði varasamt fyrir ökutæki sem taka á sig mikinn vindi og þá er fólk hvatt til þess að sýna aðgát og ganga frá lausum munum.

Spáð er 15 til 23 metrum á sekúndu með talsverðri rigningu alls staðar þar sem viðvörunin er í gildi en búast má við mjög snörpum vindhviðum, allt upp í 30 metra á sekúndu á tilteknum stöðum, einkum undir Eyjafjöllum, á Kjalarnesi og undir Hafnarfjalli.

Veðurhorfur á landinu næstu daga:

Vaxandi austan- og suðaustanátt í dag, 15-23 m/s og talsverð rigning síðdegis en hægari og úrkomulítið á NA-landi. Hlýnandi, hiti 5 til 10 stig í kvöld.

Hvöss sunnanátt og áfram vætusamt á morgun, en þurrt NA-lands. Hiti víða 8 til 13 stig.

Á sunnudag:

Suðlæg átt, víða 10-18 m/s, en allt að 23 m/s til fjalla. Talsverð rigning sunnan- og vestanlands fyrri part dags, en dregur smám saman úr úrkomu og vindi þegar líður á daginn. Hiti 5 til 10 stig.

Á mánudag:

Stíf suðaustanátt og rigning öðru hverju S- og V-lands, annars hægari vindur og léttskýjað. Hiti breytist lítið.

Á þriðjudag:

Suðlæg átt og milt veður. Léttskýjað N-til á landinu, en skýjað að mestu en úrkomulítið syðra.