Guðjón Þórðarson til Færeyja

Það fjölgar íslenskum þjálfurum í færeyska boltanum því í dag skrifaði Guðjón Þórðarson undir samning við NSÍ Runavík.

Guðjón skrifar undir tveggja ára samning við félagið en Guðjón hefur ekki verið í þjálfarastöðu síðan 2012 er hann stýrði Grindavík.

Hann hefur farið um víðan völl en meðal annars hefur hann stýrt íslenska landsliðinu, enska liðinu Stoke og Crewe Alexandra í Englandi.

NSÍ endaði í öðru sæti færeysku úrvalsdeildarinnar í ár, átján stigum á eftir Heimi Guðjónssyni og lærisveinum í HB sem rústuðu deildinni.

Annað sætið tryggði þó NSÍ Evrópusæti á næstu leiktíð svo Guðjón verður með liðið í Evrópukeppni.