Flunkuný Nintendo Switch á leiðinni

Japanski tölvuleikjarisinn Nintendo áformar að setja á markað uppfærða útgáfu af leikjatölvunni Nintendo Switch á næsta ári. Wall Street Journal greindi frá þessu í gær og sagði fyrirtækið með þessu vilja halda þeim meðbyr sem hefur verið með leikjatölvunni. Birgjar Nintendo og aðrir heimildarmenn miðilsins studdu þessa frásögn. Ekkert er þó orðið opinbert enn um hvernig tölvan verður frábrugðin þeirri upprunalegu.

Það er óhætt að segja að Switch hafi selst vel. Betur en meira að segja Nintendo átti von á. Það má einna helst rekja til þess að tölvan er ólík öðrum leikjatölvum að því leyti að hana er bæði hægt að tengja við sjónvarp og einfaldlega halda á henni og spila. Góðir dómar leikja sem er eingöngu hægt að spila á Switch, til að mynda nýjustu leikirnir í Zelda- og Mario-söguheimunum, hafa sömuleiðis hjálpað Nintendo.

Síðastu opinberu sölutölur sýndu að tuttugu milljónir eintaka hefðu selst hingað til, en tölvan kom á markað í mars 2017. Switch er sú leikjatölva Nintendo sem hefur selst hraðast. Hún á hins vegar langt í land með að ná söluhæstu leikjatölvu Nintendo, Nintendo DS, sem seldist í 154 milljónum eintaka. Hvað þá PlayStation 2 sem seldist enn betur.

Nintendo Switch Online, kerfið utan um vefspilun á tölvunni, fór í loftið í vikunni. Fram að því hafði vefspilun verið gjaldfrjáls en takmörkuð. Nú þurfa Switch-eigendur að reiða af hendi tæpar 500 krónur á mánuði, sem er töluvert minna en vefspilunaráskrift fyrir Xbox One og PlayStation 4 kostar. Með fylgir app með tuttugu sígildum leikjum fyrir NES-leikjatölvuna, fyrstu leikjatölvu Nintendo sem kom út árið 1983.