Kynntu áætlun um gerð manngerðrar eyju fyrir 35 þúsund íbúa í Kaupmannahöfn

Lars Løkke Rasmussen, forsætisráðherra Danmerkur, var á meðal þeirra sem kynntu í morgun áætlun um gerð nýrrar manngerðrar eyju í dönsku höfuðborginni. Ætlunin er að þar verði byggðar íbúðir fyrir um 35 þúsund manns. DR greinir frá þessu.

„Við viljum búa til eyju. Alveg nýja eyju í Eyrarsundi milli Refshaleøen og Nordhavn. Við höfum valið að kalla hana Lynettehólma. Þetta er risaverkefni,“ sagði Løkke á blaðamannafundinum í morgun.

Frank Jensen, aðalborgarstjóri Kaupmannahafnar, var einnig á fundinum og sögðu þeir Løkke að verkefnið væri liður í því að bregðast við íbúðaskorti í borginni. Með tilkomu fleiri íbúða verði hægt að koma í veg fyrir að fasteignaverð rjúki upp úr öllu valdi þannig að fleiri hafi efni á að búa í borginni.

„Byggja á Lynettehólma með jörð sem kemur úr öðrum verkefnum,“ segir Løkke og bætir við að verkefnið sé einnig liður í því að bregðast við aukinni umferð í borginni, þétta byggð.

Løkke segir að um langtímaverkefni sé að ræða og að eyjan kunni að verða tilbúin eftir um fimmtíu ár, eða árið 2070.