Myrti konu sína og börn í Gautaborg

Kona og tvö börn fundust látin í íbúð í Gautaborg snemma í morgun. Karlmaður er í haldi lögreglu grunaður um að hafa myrt eiginkonu sína og börn. Hann hefur jafnframt játað á sig verknaðinn, að því er fram kemur í frétt SVT.

Maðurinn tilkynnti sjálfur um morðin rétt fyrir klukkan 5 á sunnudagsmorgun að staðartíma. Samkvæmt frétt Aftonbladet var maðurinn, sem er á fertugsaldri, handtekinn í íbúðinni. Þá segir einnig í frétt blaðsins að hann hafi myrt börn sín er þau lágu í rúmum sínum.

Rannsókn er hafin á málinu og hefur lögregla girt vettvanginn af. Þá hefur ættingjum fjölskyldunnar verið gert viðvart um málið.