25 ára ellismellur í Moskvu sem fagnar komu „Arons“

Hörður Björgvin Magnússon, landsliðsmaður í fótbolta, var seldur frá Bristol City í ensku B-deildinni til rússneska stórliðsins CSKA Moskvu í sumar þar sem að hann byrjar alla leiki þessa dagana.

Hörður fékk ekki mikið að spila hjá Bristol en hann gerði nóg þar og á HM til að heilla forráðamenn rússneska veldisins sem hefur um árabil verið eitt besta lið Rússlands og fastagestur í Meistaradeildinni.

Framarinn nýtur lífsins í Moskvu. Hann segist hafa verið fljótur að koma sér inn í hlutina þó að svolítið erfitt sé að læra tungumálið.

Annar Íslendingur til Moskvu

„Ég er búinn að aðlagast mjög vel og er orðinn smá Rússi eins og allir sem að búa þarna. Nýtt þjóðerni, nýtt tungumál. Það er bara gaman að þessu. Málið er erfitt að læra en mig langar að læra það og tala það við ykkur einn daginn. Ég er gríðarlega sáttur með þetta skref sem að ég tók og þetta hefur bara verið allt upp á við,“ segir Hörður Björgvin.

Þegar að rignir, þá hellirignir. Eða svo gott sem. Aldrei hafði Íslendingur spilað fyrir CSKA Moskvu en á lokadegi félagaskiptagluggans fékk Hörður óvæntan liðsstyrk frá Íslandi þegar að táningurinn Arnór Sigurðsson var keyptur frá IFK Norrköping í Svíþjóð.

Viking is coming home! pic.twitter.com/Xy5Yg2AxiH

— PFC CSKA Moscow (@PFCCSKA_en) August 31, 2018

„Þetta er skrítin tilfinning því ég hef aldrei verið með Íslendingi í liði í atvinnumennskunni. Þetta er nýtt fyrir mér. Hann kom á lokamínútum gluggans. Þetta er efnilegur strákur sem að hefur staðið sig vel hjá Norrköping. Hann mun klárlega bæta okkar leik,“ segir Hörður sem er ekki nema 25 ára en er einn af eldri mönnum liðsins.

„Meðalaldurinn í liðinu er 22-23 ára þannig að ég er talinn einn sá elsti og reyndasti ásamt Igor Akinfeev markverði. Þetta er gríðarlegt tækifæri fyrir mig að tala betur við ungu leikmennina og gera þá betri,“ segir hann.

Líst vel á þrjá miðverði

Erik Hamrén, landsliðsþjálfari, hefur gælt við það að spila með þriggja manna miðvarðalínu sem myndi líklega þýða að Hörður færist innan í vörninni. Það er fínt því Hörður er miðvörður og spilar í þriggja manna kerfi í Rússlandi.

„Honum finnst gaman að spila með þriggja manna vörn og ég þekki það mjög vel. Ég væri sáttur með að íslenska landsliðið fari í þriggja manna. Ef að það kemur verður gaman að fá tækifæri til að spila það og hafa tvo sókndjarfa kantmenn og bakverði. Það gefur meira svigrúm fyrir okkur varnarmennina að fara framar,“ segir Hörður Björgvin.

Hörður lenti í smá basli þegar að hann bauð Arnór Sigurðsson velkominn í kynningarmyndbandi CSKA Moskvu. Hann ruglaðist þá á nöfnum og bauð Aron velkominn. Það var síðan lagað með góðu döbbi.

Stóra spurningin er því: Aron eða Arnór?

„Verðum við ekki að segja bara Aron,“ segir Hörður Björgvin Magnússon og hlær dátt.