Ólafía í góðum málum eftir frábæran endasprett

Ólafía Þórunn Kristinsdóttir ætti að fljúga í gegnum niðurskurðinn á CP Classic mótinu í golfi sem fram fer í Kanada spili hún eins vel í dag og hún gerði í gær.

Ólafía er á fjórum höggum undir pari eftir fyrsta hringinn, jöfn í 18.-34. sæti. Efstu konur eru á átta höggum undir pari.

Ólafía byrjaði illa í gær, fékk skolla á 11. holu sem var hennar önnur hola þar sem hún byrjaði á tíunda teig. Hún fékk hins vegar örn á 14. holu, fór par 5 holuna á þremur höggum, og var komin á eitt högg undir parinu.

Á eftir fylgdu fjölmörg pör þar til Íþróttamaður ársins 2017 fór á svakalegan endasprett og fékk þrjá fugla á síðustu fjórum holunum.

Hún endaði því keppni í nótt á fjórum höggum undir pari. Áður en annar hringurinn fer af stað er niðurskurðarlínan miðuð við tvö högg undir par og Ólafía ætti því að vera nokkuð örugg áfram spili hún eins vel í dag og hún gerði í nótt.

Ólafía hefur leik klukkan 7:22 að staðartíma, sem er klukkan 13:22 að íslenskum tíma. Hún er á meðal fyrstu kylfinga til þess að fara út á völlinn í dag.

Góður árangur á þessu móti er Ólafíu nauðsynlegur þar sem hún berst fyrir því að halda sæti sínu á mótaröðinni.