Fjólublár moli er vinsælastur

Fjólublái molinn í Quality Street boxinu, sem við Íslendingar höfum vanalega kallað Mackintosh, er vinsælastur meðal bresku þjóðarinnar. Þetta leiddi könnun YouGov í ljós.

Alls sögðu 37 prósent af 2.045 manna úrtaki að þeim þætti fjólublái molinn bestur. Græni þríhyrningurinn og bronslitaði karamellumolinn komu næstir með ríflega fjórðung svarenda. Þar á eftir komu rauði jarðarberjamolinn, appelsínuguli molinn með appelsínufyllingunni og græni mjólkursúkkulaðibitinn.

Á botninum var blái kókosmolinn en aðeins um þrettán prósent sögðu hann í uppáhaldi. Næst fyrir ofan með sextán prósent svarenda var karamelluskildingurinn.