Flókadalsá að fyllast af bleikju

Núna fara stóru að göngurnar af sjóbleikju að mæta í árnar um allt land og miðað við fréttir úr Flókadalsá er ballið að byrja.

Flókadalsá er ein af skemmtilegri bleikjuám á landinu og þar er hægt að gera mjög góða bleikjuveiði og jafnvel setja í lax.  Sjóbleikjan er greinilega farin að ganga af fullum krafti í ána því holl sem var að byrja veiðar í dag tók kvótann á allar stangirnar á aðeins tveimur klukkutímum.  Í samtali við Veiðivísi sagði Þórarinn Halldórsson leigutaki Flókadalsár að áin væri kraumandi af bleikju en eins og áður sagði tóku allar stangir kvótann á tveimur tímum en kvótinn í ánni er 8 bleikjur á stöng á vakt en veitt er á þrjár stangir í ánni.  Það verður gaman að heyra af ánum á norðurlandi næstu daga sem sjóbleikjan gengur í en miðað við þessa veiði í Flókadalsá hlýtur að styttast í frekari fregnir af sjóbleikjuveiði.