Portman svitnaði og svitnaði þegar hún borðaði eldheita vængi og svaraði spurningum

Óskarsverðlaunaleikkonan Natalie Portman var á dögunum gestur í þætti First We Feast á You-Tube en þeir kallast einfaldlega Hot Ones.

Í þáttunum ræða þáttastjórnandinn og gesturinn saman en á sama tíma borða þau vel sterka vængi með mismunandi sterkum sósum.

Sósurnar verða alltaf sterkari og sterkari þegar líður á þáttinn og undir lokin er í raun orðið óbærilegt að tala. Portman fékk vegan vængi en hún er grænmetisæta.

Í þættinum kom í ljós að Portman er mikill áhugamaður um góða hip-hop tónlist og kláraði hún sálfræðinám við háskólann í Harvard.

Vængirnir voru orðnir mjög erfiðir viðureignar undir lok þáttarins eins og sjá má hér að neðan.