Baráttan um HM-gullskóinn: Kane leiðir með tveimur mörkum

Harry Kane er markahæsti leikmaðurinn á HM með sex mörk er mótið er komið fram í átta liða úrslitin. Topp tveir í baráttunni um gullskóinn koma úr ensku úrvalsdeildinni.

Kane byrjaði mótið af krafti og skoraði tvö mörk gegn Túnis í fyrsta leiknum. Hann skoraði svo þrjú gegn Panama og eitt í sigurleiknum gegn Kólumbíu í gær.

Kane skoraði þó einnig í vítaspyrnukeppninni en í baráttunni um gullskóinn á HM telst ekki mörk úr vítaspyrnukeppni með. Tottenham-framherjinn er því kominn með sex mörk á 276 mínútum í keppninni.

Í öðru sæti er Romelu Lukaku með fjögur mörk á þeim 242 mínútum sem hann hefur spilað. Bæði England og Belgía voru í G-riðli þar sem framherjarnir náðu að raða inn mörkum gegn Túnis og Panama.

Í þriðja sætinu er svo Cristiano Ronaldo með fjögur mörk en Portúgal er úr leik svo Ronaldo skorar ekki meira þetta HM-mótið.

Sex leikmenn eru svo með þrjú mörk, þar á meðal tveir Rússar en tveir af þessum sex leikmönnum eru dottnir úr keppni svo þeir skora ekki meir í ár (Diego Costa - Spánn og Yerry Mina - Kólumbía).

Þetta verða því líklega Kane og Lukaku sem berjast um gullskóinn í ár. England mætir Svíþjóð í átta liða úrslitunum á laugardaginn en Belgarnir spila við Brasilíu á föstudagskvöldið.

Hér má sjá listann í heild sinni.