Beit í kynfæri árásarmanns á Hróarskelduhátíðinni

Ráðist var á 22 ára konu frá Vanløse á hátíðarsvæði Hróarskelduhátíðarinnar aðfaranótt laugardagsins. Lögregla í Danmörku segir að konan hafi komist undan tveimur hettuklæddum árásarmönnum eftir að hafa bitið í kynfæri annars þeirra sem sá hafði þröngvað upp í munn hennar.

Á heimasíðu lögreglunnar á Mið- og Vestursjálandi  segir að árásin hafi verið gerð klukkan 4:15 austarlega á hátíðarsvæðinu og eru árásarmennirnir sagðir hafa verið á þrítugsaldri.

„Annar þeirra ýtti henni inn í runna og hinn reif stuttermabol hennar í sundur. Annar mannanna stakk þá typpi sínu í munn konunnar, sem leiddi til þess að konan beit árásarmanninn,“ segir á heimasíðunni.

Tókst konunni svo að komast undan árásarmönnunum eftir að hafa sparkað í þá.

Ekki er vitað hverjir árásarmennirnir voru og ganga þeir lausir.