„Kannski enda ég í vinstri bakverði þegar ég kem heim“

Valsmenn unnu sinn þriðja leik í röð í Pepsi-deild karla þegar liðið lagði KA 3-1 í gærkvöldi. Íslandsmeistararnir fóru heldur rólega af stað á Íslandsmótinu en eru nú eftir átta umferðir og þrjá sigra í röð komnir á toppinn, á sama tíma og Birkir Már Sævarsson hefur verið frá keppni vegna undirbúnings landsliðsins fyrir HM.

„Við unnum samt fyrsta leikinn áður en ég fór líka, ég verð að taka það fram,“ segir Birkir Már léttur. 

Birkir kom á sínum tíma nokkuð óvænt inn í Valssliðið sumarið 2006 og stimplaði sig inn í hægri bakvörðinn í fjarveru Steinþórs Gíslason sem var meiddur. Þegar Steinþór náði sér af meiðslunum varð hann að gjöra svo vel að læra á stöðu vinstri bakvarðar. Sem hann gerði að sinni.

Raunar vill Steinþór meina að hann sé ekki síður miðjumaður en bakvörður þótt örlögin hafi leitt hann í stöðu bakvarðar lungann af ferlinum. Kappinn starfar í dag sem verkfræðingur.

En ætli það verði örlög Birkis Más? Að þurfa að breyta til í ljósi þess að Arnar Sveinn Geirsson hefur verið að spila afar vel í stöðu hægri bakvarðar í fjarveru Birkis Más?

„Kannski enda ég í vinstri bakverði þegar ég kem heim og slæ Bjarna út úr liðinu í staðinn,“ segir Birkir og hlær. 

„Nei nei, vonandi vinnum við alla leiki á meðan ég er í burtu og þá er bara að koma sér aftur í liðið þegar ég kem til baka.“

Vísir er með öflugt teymi í Rússlandi sem verður með ítarlegan fréttaflutning af íslenska liðinu á HM. Fylgist með á samfélagsmiðlum okkar - á Facebook, Twitter og Instagram.