Gina Haspel nýr forstjóri CIA fyrst kvenna

Öldungadeild Bandaríkjaþings samþykkti í dag tilnefningu Ginu Haspel til stöðu forstjóra bandarísku leyniþjónustunnar, CIA. Haspel er þar með fyrsta konan til að gegna starfinu.

Tilnefning Haspel hefur mætt nokkurri andstöðu. Hún stýrði leynifangelsi CIA í Taílandi árið 2002 þar sem grunaðir hryðjuverkamenn voru beittir vatnspyntingum. Hún tók einnig þátt í að eyða myndbandssönnunargögnum um pyntingarnar árið 2005. Haspel hefur gefið það út að hún hyggist ekki endurvekja áðurnefndar pyntingaáætlanir leyniþjónustunnar.

Sjá einnig: Konan sem á að stýra CIA tengist „svartasta kaflanum“ í sögu Bandaríkjanna

54 þingmenn greiddu atkvæði með tilnefningu Haspel í dag, þar af sex Demókratar, en nær allir þingmenn Repúblikanaflokksins höfðu lýst yfir stuðningi við tilnefningu hennar. 45 greiddu atkvæði á móti tilnefningunni.

Haspel er 61 árs og hefur gegnt stöðu aðstoðarforstjóra CIA síðan í febrúar 2017. Hún tók við sem starfandi forstjóri í lok apríl síðastliðnum en Donald Trump Bandaríkjaforseti hafði þá skipað þáverandi forstjóra, Mike Pompeo, í stöðu utanríkisráðherra í stað Rex Tillersons.

Þá óskaði Trump Haspel til hamingju með nýja starfið á Twitter-reikningi sínum í kvöld.

Congratulations to our new CIA Director, Gina Haspel! pic.twitter.com/n1xj9LSV9D

— Donald J. Trump (@realDonaldTrump) May 17, 2018