Annie Mist og Ragnheiður Sara eiga góða möguleika á að komast á heimsleikana

Eftir annan daginn í Berlín standa leikar þannig að Annie er í þriðja sæti og Ragnheiður Sara fylgir á hæla hennar í því fjórða. Björk Óðinsdóttir er í áttunda sæti, Þuríður Erla í því tíunda og Sólveig í 38.sæti.

Fredrik Aegidius er í fjórða sæti, Björgvin Karl hoppar upp í sjötta sæti, Sigurður er í fimmtánda sæti og Árni Björn í átjánda sæti.

Katrín Tanja flaug í gegnum báða viðburði gærdagsins á East Regionals og tók fyrsta sæti í báðum viðburðum. Hún sagði eftir leikana í fyrra að það hefði verið gott fyrir hana að tapa þeim til þess að sjá hversu mikið hún vill vinna.

Í dag takast keppendur á við tvo styttri viðburði heldur en í gær. Í fyrri viðburði dagsins þurfa keppendur að gera 9 muscle ups, ganga síðan á höndum og gera hnébeygju á einum fæti. Endurtekningarnar eru 35-45-54 í hnébeygjunum.

Strákarnir riðu á vaðið fyrstir og Sigurður Þrastarson sem hafði verið efsti Íslendingurinn náði sér ekki á strik í þessum viðburði og kom inn í 38.sæti. Árni Björn Kristjánsson lenti svo í 24.sæti. Björgvin Karl náði öðru sæti í þessum viðburði og ljóst að fimleikabakgrunnur hans kom sér vel, sérstaklega í handstöðugöngunni. Fredrik Aegidius lenti í fimmta sæti.

Björk Óðinsdóttir tók annað sætið og Annie Mist náði þriðja sætinu hjá konunum. Þuríður kom svo inn í þriðja sætið, Ragnheiður Sara náði ellefta sætinu og Sólveig Sigurðardóttir hafnaði í 38.sæti.

Björgvin kominn á skrið

Í seinni viðburði dagsins byrja keppendur á tveimur umferðum af tíu snörunum (e.snatch) með með tæplega 80 kíló fyrir karlana og tæplega 57 kíló fyrir konurnar og síðan tólf endurtekningar af burpees. Þegar því er lokið eru svo tvær umferðir af tíu snörunum (e.snatch) með rúmlega 52 kíló fyrir karlana og 34 kíló fyrir konurnar. Að því loknu eru svo tólf endurtekningar af burpees. Tímaramminn fyrir þennan viðburð er 9 mínútur og því ljóst að keppendur munu þurfa að fara hratt í gegnum þessar æfingar.

Sem fyrr voru karlarnir fyrstir á svið og Björgvin Karl átti ekki í vandræðum með þennan viðburð. Hann er greinilega hrokinn í gang og vann sinn riðil. Björgvin sagði í viðtali eftir síðari viðburð dagsins að hann hefði meitt sig í hnénu á æfingu heima á Íslandi og að hann hefði verið frekar stressaður fyrir helginni. Fredrik Aegidius var í harðri baráttu við hinn sænska Lukas Högberg en Daninn hafði betur. Sigurður kom svo inn fljótlega á eftir honum en Árni Björn var með þeim síðustu til þess að klára í þeirra riðli.

Sólveig Sigurðardóttir byrjaði vel en náði ekki að halda út. Næst voru það Þuríður Erla og Björk í sama riðli og þær gerðu báðar mjög góða hluti. Björk tók fljótlega forystuna en það var ekki fyrr en í seinni umferðunum sem Þuríður Erla náði henni. Þetta var hörð keppni allt til enda og Björk tók fyrsta sætið í sínum riðli og Þuríður Erla tók þriðja.

Í fjórða og síðasta riðli dagsins var komið að Annie og Ragnheiði Söru. Allir í þessum riðli byrjuðu frekar hratt sem getur komið sér illa. Annie og Ragnheiður tóku forystuna en það var Ragnheiður sem bar sigur úr býtum í þeirra riðli en Annie kom í mark rétt á eftir henni.

Katrín Tanja hefur keppni innan skamms fyrir vestan haf en það má fylgjast með henni í beinni útsendingu.