Landsmenn orðnir 350 þúsund

Alls bjuggu 350.710 manns á Íslandi í lok fyrsta ársfjórðungs 2018 og fór fjöldi landsmanna því í fyrsta skipti yfir 350 þúsund. Landsmönnum fjölgaði um 2120 á ársfjórðungnum eða um 0,6 prósent. Þetta kemur fram í nýjum tölum Hagstofu Íslands sem birtar voru í morgun.

Af hinum rúmlega 350 þúsund sem nú eru búsettir á landinu eru 178.980 karlar og 171.730 konur. Á höfuðborgarsvæðinu bjuggu 224 þúsund manns en 126.710 utan höfuðborgarsvæðisins.

Þá fæddust alls 970 börn á fyrsta ársfjórðungi 2018 en 600 einstaklingar létust. Á sama tíma fluttust 1.740 fleiri einstaklingar til landsins en frá því. Aðfluttir einstaklingar með íslenskt ríkisfang voru 20 umfram brottflutta. Aðfluttir erlendir ríkisborgarar voru 1.720 fleiri en þeir sem fluttust frá landinu. Fleiri karlar en konur fluttust frá landinu.

Danmörk var helsti áfangastaður brottfluttra íslenskra ríkisborgara en þangað fluttust 150 manns á fyrsta ársfjórðungi 2018. Alls fluttust 560 íslenskir ríkisborgarar frá landinu og af þeim fluttust 370 til Danmerkur, Noregs og Svíþjóðar. Af þeim 810 erlendu ríkisborgurum sem fluttust frá landinu fóru flestir til Póllands, 300 manns.

Flestir aðfluttir íslenskir ríkisborgarar komu frá Danmörku (190), Noregi (120) og Svíþjóð (90), samtals 400 manns af 580. Pólland var upprunaland flestra erlendra ríkisborgara en þaðan fluttust 770 til landsins af alls 2.530 erlendum innflytjendum. Litháen kom næst, en þaðan fluttust 320 erlendir ríkisborgarar til landsins. Í lok fjórða ársfjórðungs bjuggu 39.570 erlendir ríkisborgarar á Íslandi.