Birna Rún fékk höfuðhögg í gær en stígur á sviðið í kvöld

Eins og Vísir greindi frá í gærkvöld þurfti að hætta sýningu á farsanum Sýningin sem klikkar í Borgarleikhúsinu eftir að leikkonan Birna Rún Eiríksdóttir fékk þungt högg þegar hurð skall á andliti hennar. Atvikið átti sér stað rétt fyrir hlé en Birna hélt ótrauð áfram leik.

Mikið gekk á í verkinu þegar þetta gerðist og áttuðu hvorki leikarar né áhorfendur sig á því að eitthvað hefði komið upp á að sögn leikhússtjórans. Þegar hugað var að Birnu í hléi kom hins vegar í ljós að hún hafði hlotið skurð á vörina sem hafði bólgnað mikið og var því ákveðið að hætta sýningu.

Borgarleikhúsið hefur sent frá sér tilkynningu vegna málsins og þar segir að sýningin verði sýndi í kvöld samkvæmt áætlun.

„Eins og komið hefur fram í fréttum varð slys á sýningunni miðvikudagskvöldið 11. apríl sem varð til þess að stöðva þurfti sýninguna. Ein leikkona sýningarinnar varð fyrir höfuðhöggi með þeim afleiðingum að hún marðist og sprengdi vör. Betur fór en á horfðist og getur leikkonan stigið á svið í kvöld,“ segir í tilkynningunni.

Þeir sem þurftu að yfirgefa sýninguna í hléi í gær verður boðið aftur á sýninguna og eru beðnir um að hafa samband við miðasölu Borgarleikhússins.