Hræðileg byrjun hjá Ólafíu í LA

Hrikaleg byrjun fór illa með Ólafíu Þórunni Kristinsdóttur á fyrsta hring á Hugel-JTBC mótinu sem er hluti af LPGA mótaröðinni í golfi. Ólafía lauk leik á fjórum höggum yfir pari.

Ólafía byrjaði á skolla strax á fyrstu braut. Hún paraði næstu tvær holur en fékk svo skolla á 4. og 5. braut, tvöfaldan skolla á þeirri sjöttu og skolla á sjöundu og var komin sex högg yfir parið.

Íþróttamaður ársins 2017 náði að bjarga einu höggi á níundu holu og kláraði því fyrri níu á fimm höggum yfir pari.

Seinni níu holurnar voru mun betri hjá Ólafíu, hún fór þær allar á pari nema þá 14., þar fékk hún fugl. Því lauk hún leik á fjórum höggum yfir pari.

Útlitið var þó ágætt hjá Ólafíu, hún var í kringum 70. - 80. sætið og hefði góð spilamennska á morgun alveg getað skilað henni í gegnum niðurskurðin. Eftir því sem leið á kvöldið féll hún þó neðar og neðar í töflunni, þrátt fyrir að tapa ekki höggi, því fleiri kylfingar hófu leik og röðuðu sér í sætin fyrir ofan hana.

Þegar þessi frétt er skrifuð er Ólafía í 107. - 114. sæti og enn eiga 18 kylfingar eftir að fara út í brautina og fjölmargir eru enn að spila sinn hring.

Miðað við stöðuna þegar þessi frétt er skrifuð ætti niðurskurðarlínan á morgun að vera í kringum parið eða eitt högg yfir pari. Því er vel möguleiki fyrir Ólafíu að komast þar í gegn, en þá þarf hún að spila mun betur en hún gerði í byrjun dags í dag.

Bein útsending frá mótinu hefst klukkan 22:30 á Golfstöðinni.