Tók frumsamið lag tileinkað fyrrverandi kærastanum sem stakk hana í bakið

Harper Grace flutti frumsamið lag í American Idol á dögunum en hún er komin áfram í aðra umferð í þáttunum og kom fram í svokallaðri Hollywood-viku.

Lagið sem Grace flutti ber nafnið R.I.P. eða Hvíl í friði. Hún tileinkar laginu fyrrverandi kærastanum sínum en hann mun hafa svikið hana harkalega á sínum tíma og stungið hana í bakið eins og hún orðar það sjálf.

Harper Grace vakti fyrst athygli sumarið 2012 þegar myndband af henni að flytja þjóðsöng Bandaríkjanna fór eins og eldur í sinu um heim allan.

Grace flutti þjóðsönginn fyrir framan 22.000 manns fyrir leik í MLS-deildinni og var hún þá aðeins 11 ára. Grace fékk yfir sig holskeflu af gagnrýni á sínum tíma og var sagt að um væri að ræða versta flutning á þjóðsöng Bandaríkjamanna í sögunni.

Nú sex árum síðar er hún að slá í gegn í þáttunum.