Hjörtur sló Eggert úr bikarnum

Bröndby skoraði sigurmark á síðustu mínútum framlengingar og sló þar með Sönderjyske út úr dönsku bikarkeppninni í kvöld.

Daninn Christian Norgaard skoraði sigurmarkið á 118. mínútu eftir að hvorugu liði hafði tekist að koma boltanum í netið.

Bæði lið áttu þó nóg af marktækifærum, Bröndby átti 14 marktilraunir og Sönderjyske 12.

Eggert Gunnþór Jónsson og Hjörtur Hermannsson spiluðu báðir allan leikinn fyrir lið sín. Hjörtur fer áfram í undanúrslitin en Eggert Gunnþór og félagar sitja eftir.