Maísmjöl út um allt eftir árekstur flutningabíls á fleygiferð

Mildi þykir að engin slys urðu á fólki þegar fullestaður vörubíll af maísmjöli rakst upp í göngubrú í Kanada á miðvikudaginn.

Eins og sjá má á meðfylgjandi myndbandi virðist sem svo að ökumaður bílsins hafi ekki gert sér grein fyrir því að gámur bílsins væri í uppréttri stöðu er hann fór undir brúna.

Sjá má hvernig maísmjölið þeytist í allar áttir við áreksturinn en loka þurfti veginum um dágóðan tíma þar sem slysið átti sér stað á meðan hreinsunarstarf stóð yfir.

Ökumaður bílsins slapp ómeiddur og enginn var á göngubrúnni er áreksturinn varð. Göngubrúin hefur verið tekin niður eftir áreksturinn.