McIlroy tilbúinn í einvígi við Reed um sigurinn

Rory McIlroy og Patrick Reed munu berjast um sigurinn á Mastersmótinu í golfi þegar fjórði og síðasti hringurinn verður leikinn í dag.

Reed er með þriggja högga forystu á McIlroy fyrir lokahringinn, en þeir eru saman í síðasta ráshópnum sem fer af stað klukkan 18:40 í kvöld að íslenskum tíma.

Reed leiddi mótið eftir annan hring og er enn í forystunni eftir að hafa farið hringinn í gær á fimm undir pari. McIlroy lék þó betri hring en Bandaríkjamaðurinn í gær því hann fór þriðja hringinn á sjö undir.

McIlroy hefur verið í svipaðri stöðu áður, en hann hefur endað á topp 10 í síðustu fjögur skipti sem hann hefur tekið þátt á mótinu.

„Þetta er ekki auðvelt, sérstaklega ekki ef þetta er í fyrsta skipti sem þú ert í þessari stöðu,“ sagði McIlroy við Sky Sports, en Reed hefur ekki unnið risamót á ferlinum.

Norður-írinn var í svipaðri stöðu og Reed árið 2011, leiddi með fjórum höggum fyrir loka hringinn. Þá réð hann ekki við pressuna og endaði á því að fara síðasta hringinn á átta höggum yfir pari.

„Ég ætla að fara út á völlinn og spila eins og ég hafi engu að tapa og allt að vinna.“

„Hann [Reed] er augljóslega að spila mjög vel og ef hann heldur áfram á sömu braut þarf ég annan hring eins og þennan til að eiga möguleika.“

„Þessi lokahringur árið 2011 var stór stund á mínum ferli. Eftir þennan hring var ég tilbúinn til þess að vinna risamót,“ sagði Rory McIlroy.

Fari svo að McIlroy endi uppi sem sigurvegar á mótinu verður hann aðeins sjötti kylfingurinn í sögunni til þess að vinna öll fjögur risamótin í golfi á ferlinum.

Einvígi McIlroy og Reed og allt hið besta á lokahring Mastersmótsins verður í beinni útsendingu á Golfstöðinni frá klukkan 18:00.