Bílbruni við Keflavíkurflugvöll

Tilkynnt var um bílbruna við Keflavíkurflugvöll á sjötta tímanum í morgun. Að sögn varðstjóra hjá brunavörnum Suðurnesja var um að ræða yfirgefinn bíl sem hugsanlega hafði verið kveikt í en slökkviliðsmenn voru fljótir að ráða niðurlögum eldsins.

Þá barst tilkynning um eldsvoða í íbúðarhúsi við Skógarbraut í Reykjanesbæ á níunda tímanum. Varðstjóra skildist að þar hefði kviknað í kommóðu en búið hafi verið að slökkva eldinn áður en slökkviliðsmenn komu á staðinn. Þeir voru þó fengnir til að reykræsta og leggja mat á tjón, en um minniháttar tilvik var að ræða.