Enginn Guðjón Valur í fyrsta landsliðshópi Guðmundar

Guðmundur Guðmundsson, landsliðsþjálfari í handbolta, valdi í dag sinn fyrsta hóp eftir að taka við landsliðinu í þriðja sinn en fyrsta verkefni hans verður sterkt fjögurra landa mót í Noregi í byrjun apríl. Miklar breytingar eru hópnum sem fór til Króatíu í janúar á EM 2018.

Mótið sem um ræðir heitir Golden League eða Gulldeildin þar sem Ísland mætir Noregi, Frakklandi og fyrrverandi lærisveinum Guðmundar í danska landsliðinu.

Mikla athygli vekur að Guðjón Valur Sigurðsson, fyrirliði íslenska liðsins, er ekki í hópnum en hann hefur verið fastamaður í liðinu í tæpa tvo áratugi og verið fyrirliði síðan Ólafur Stefánsson lagði landsliðsskóna á hilluna. Stefán Rafn Sigurmannsson kemur inn í hópinn á ný eftir að vera úti í kuldanum undanfarin ár og er með Bjarka Má Elíssyni í vinstra horninu.

Guðjón Valur Sigurðsson fékk frí frá landsliðinu að þessu sinni af fjölskylduástæðum en hann er á sama tíma að fylgja dóttur sinni til Bandaríkjanna sem er að velja sér háskóla.

Alls eru sjö leikmenn ekki í hópnum sem voru með á EM í Króatíu. Fjórir aðrir eru ekki valdir og tveir eru meiddur en það eru þeir Ásgeir Örn Hallgrímsson og svo Janus Daði Smárason sem hefur ekki spilað með liði sínu Álaborg undanfarnar vikur.

Haukur Þrastarson, 16 ára gamall leikstjórnandi Selfoss í Olís-deild karla, er nýliði í hópnum en hann hefur einn allra besti leikmaður íslensku deildarinnar í vetur, bæði í vörn og sókn. Alexander Júlíusson, leikmaður Vals, er einnig í hópnum.

Aðrir reynsluboltar sem fá nú aftur tækifærið eftir komu Guðmundar eru þeir Vignir Svavarsson og Ólafur Gústafsson. Þá kemur Aron Rafn Eðvarðsson aftur í markið auk þess sem að hinn stórefnilegi markvörður Framara, Viktor Gísli Hallgrímsson, fer með til Noregs.

Hópurinn:

Markverðir:

Björgvin Páll Gústavsson, Haukar

Aron Rafn Eðvarðsson, ÍBV

Viktor Gísli Hallgrímsson, Fram

Vinstri hornamenn:

Bjarki Már Elísson, Füchse Berlín

Stefán Rafn Sigurmannsson, Pick Szeged

Vinstri skyttur:

Ólafur Guðmundsson, Kristianstad

Aron Pálmarsson, Barcelona

Ólafur Gústafsson, Kolding

Leikstjórnendur:

Haukur Þrastarson, Selfoss

Gísli Þorgeir Kristjánsson, FH

Ólafur Bjarki Ragnarsson, Kristianstad

Hægri skyttur:

Rúnar Kárason, Hannover-Burgdorf

Ragnar Jóhannsson, Hüttenberg

Ómar Ingi Magnúson, Aarhus

Hægri hornamenn:

Arnór Þór Gunnarsson, Bergischer

Theodór Sigurbjörnsson, ÍBV

Línumenn:

Arnar Freyr Arnarsson, Kristianstad

Vignir Svavarsson, Team-Tvis Holstebro

Ýmir Örn Gíslason, Valur

Varnarmenn:

Alexander Örn Júlíusson, Valur