Hannes segir að rannsóknarleyfið tengist ekki kvörtunum nemenda

Hannes Hólmsteinn Gissurarson prófessor við stjórnmálafræðideild Háskóla Íslands birti blogg í gær um rannsóknarleyfi sitt. Ástæðan er fyrirspurn frá blaðamanni student.is  um það hvort leyfið tengist kvörtunum nemenda síðan fyrr í vetur. Birti Hannes bæði fyrirspurn blaðamannsins og svar sitt.

Kvörtuðu undan Hannesi og kennslubókinni

Hannes mun ekki kenna áfangann Stjórnmálaheimspeki á komandi haustmisseri. Í frétt student.is er það sett í samhengi við að í desember á síðasta ári skiluðu 65 fyrrverandi og núverandi nemendur stjórnmálafræðideildar undir kröfu um að nemendum yrði ekki áfram skylt að sitja áfangann, bók Hannesar Saga Stjórnmálafræðikenninga yrði ekki notuð aftur sem kennslugagn og Hannes væri ávíttur opinberlega.

Sjá einnig: Stjórnmálafræðinemar rísa upp gegn Hannesi Hólmsteini 

„Í stjórnmálafræðideild Háskóla Íslands er kennslubók og kennsluhættir sem innihalda kvenfyrirlitningu, fitufordóma, kynþáttafordóma og niðurlægjandi orð um fatlaða. Við krefjumst þess að Háskóli Íslands og stjórnmálafræðideild taki ábyrgð. Tíðar kvartanir hafa ekki skilað árangri og tökum við því þetta skref. Lítilsvirðing á hópa og einstaklinga í kennslutímum og kennslugögnum í áfanganum Stjórnmálaheimspeki undir stjórn Hannesar Hólmsteins Gissurarsonar er ólíðandi,“ sagði meðal annars í yfirlýsingu nemanna.

Áður borist kvörtun

Baldur Þórhallsson, prófessor og deildarforseti stjórnmálafræðideildar Háskóla Íslands, staðfesti samdægurs í samtali við Vísi að deildinni hafi borist kvartanir tengdar námskeiðinu Stjórnmálaheimspeki. Það mál væri í vinnslu.

Baldur staðfesti einnig að þær kvartanir væru ekki þær einu sem hafi borist vegna kennslu Hannesar.

„Ef ég man rétt þá hefur ein formleg kvörtun borist áður og hún var tekin mjög alvarlega og hún fór í tiltekið ferli og lauk með niðurstöðu sem ég veit ekki betur en að nemandinn hafi sætt sig við,“ útskýrði Baldur.

 

Gagnrýnir vinnubrögð blaðamanns

Hannes birtir öll samskipti sín við blaðamanninn á bloggsíðu sinni og í svari hans kemur fram að honum finnist rannsóknarleyfið ekki fréttnæmt. Gagnrýnir hann vinnubrögð blaðamannsins og segir að hann voni að þau verði faglegri í framtíðinni.

„Mér finnst þessi spurningaleikur furðulegur. Ég er ekki fyrsti prófessorinn, sem fer í rannsóknarleyfi og þarf að ráðstafa námskeiðum sínum á meðan, og áreiðanlega ekki hinn síðasti. Hvers vegna er ég sérstaklega tekinn úr? Og hvers vegna er ætlunin að birta sérstaka „frétt“ um rannsóknarleyfi mitt?“

Hann segir að upprunalega hafi hann óskað eftir rannsóknarleyfi á vormisseri 2019 en síðan breytt því í haustmisseri 2018.

„Ég talaði við einn heimspekiprófessorinn, sem oft hefur verið mér ráðhollur. Hann stakk upp á því, að námskeið í heimspeki, sem er um margt sambærilegt við námskeið mitt, yrði látið koma í stað míns námskeiðs. Kvað hann eitthvað svipað oft hafa verið gert við svipaðar aðstæður. Forseti minnar deildar var sáttur við það, og kennari námskeiðsins var fús að taka þetta að sér. Þegar ég hafði þannig ráðstafað kennslunni á eðlilegan hátt, bað ég um að fá frekar rannsóknarleyfi á haustmisseri. Var orðið við því, eins og eðlilegt var.“

Neitaði að svara deildarforseta

Í frétt student.is kemur fram að öll námskrá deildarinnar hafi verið samþykkt á fundi þann 20. desember nema námskeið Hannesar. Á þetta að koma fram í fundargerð sem ritstjórn student.is hefur í höndunum. 

„Í fundargerð Stjórnmálafræðideildar kemur fram að óskað hafi verið eftir viðbrögðum Hannesar við kvörtunum nemenda fyrir deildarfundinn 21. desember. „Hannes neitaði að svara deildarforseta og það ekki í fyrsta skipti,“ segir orðrétt í fundargerðinni.“

Hannes þvertekur í svari sínu fyrir að leyfið tengist kvörtunum nemenda eða undirskriftalistanum sem var skilað inn til deildarinnar.

„Það var enginn þrýstingur á mig um eitt eða neitt í þessu máli. Það hefur gengið sinn venjulega og eðlilega gang. Öll mín samskipti við yfirmenn Háskólans hafa verið algerlega óaðfinnanleg. Ég þekki ekki þennan nemendalista, sem nefndur er í spurningalistanum. Enginn hefur minnst á hann við mig, en ég hef séð eitthvað smávegis um hann í fjölmiðlum. Annars er þetta ekkert nýtt. Það var skipulögð undirskriftasöfnun meðal nemenda 1988 til að reyna að fá menntamálaráðherra til að veita mér ekki lektorsembætti í stjórnmálafræði. Það hafði engin áhrif, hvorki á mig né ráðherrann og því síður á framtíðina, sem nú er nútíð.“

Hann fer svo yfir verkefni, skýrslur og rannsóknarritgerðir sem hann er að sinna í augnablikinu. Þar á meðal er ævisaga Péturs Magnússonar bankastjóra, ráðherra og varaformanns Sjálfstæðisflokksins.

Svar Hannesar má lesa í heild sinni á bloggsíðu hans.