Sigríður Jónsdóttir metin hæfust

Ásmundur Einar Daðason, félags- og jafnréttismálaráðherra, hefur skipað Sigríði Jónsdóttur, sérfræðing í velferðarráðuneytinu, til að fara með stjórn nýrrar gæða- og eftirlitsstofnunar á sviði félagsþjónustu. Samkvæmt frétt á vef Velferðarráðuneytisins er ákvörðun Ásmundar í samræmi við niðurstöðu ráðgefandi nefndar sem mat Sigríði hæfasta úr hópi umsækjanda. 22 einstaklingar sóttu um stöðuna.

Áratuga reynsla

Sigríður er með BA gráðu í almennum þjóðfélagsfræðum og framhaldsgráðu frá háskólanum í Manchester. Í umsögn hæfnisnefndar segir að Sigríður hafi varið starfsævi sinni innan félagsmálageirans, fyrst sem ráðgjafi innan félagsþjónustu og sérfræðingur en síðar sem millistjórnandi. Á þeim tíma hafi hún látið mikið til sín taka í rannsóknum og þróun gæðastarfs. Þá hafi hún starfað við undirbúning hinnar nýju stofnunar hjá velferðarráðuneytinu.

„Sigríður hefur afar yfirgripsmikla þekkingu á starfssviði hinnar nýju stofnunar sem og á opinberri stjórnsýslu. Hún er reyndur stjórnandi og hefur djúpan skilning á tilgangi og hlutverki hinnar nýju stofnunar. Hún hefur áratuga reynslu af vinnu við upplýsingaöflun, gagnavinnslu, gæðamat og árangursmat og hefur skarpa framtíðarsýn fyrir hönd stofnunarinnar,“ segir meðal annars í umsögn hæfnisnefndarinnar.

Efla stjórnsýslu félagsþjónustu

Samkvæmt frétt Velferðarráðuneytisins mun nýja stofnunin annast stjórnsýslu og eftirlit með félagsþjónustu sem veitt er af hálfu sveitarfélaga, opinberra stofnana eða á grundvelli samninga. Undir félagsþjónustu sveitarfélaga heyrir meðal annars ýmis þjónusta sem snýr að börnum, fjölskyldum, fötluðu fólki, öldruðum og innflytjendum.

Stefnt er að því að eftirlit með barnaverndarmálum sem nú er á hendi Barnaverndarstofu verði einnig á ábyrgð stofnunarinnar og er unnið að gerð lagafrumvarps þess efnis í velferðarráðuneytinu.

„Ákvörðun um að fela þessi verkefni sérstakri stofnun byggist á tillögum nefndar sem ráðherra félagsmála skipaði árið 2014 með það að markmiði að styrkja undirstöður heildstæðrar þjónustu ríkis og sveitarfélaga og skilja með skýrum hætti á milli stjórnunar- og eftirlitshlutans annars vegar og veitingu þjónustunnar hins vegar.“

Nýja stofnunin er ráðuneytisstofnun og fer um skipulag hennar samkvæmt 17. gr. laga um Stjórnarráð Íslands. Samkvæmt upplýsingum frá Velferðarráðuneytinu er ætlað er að hún taki til starfa innan fárra vikna.