Ráða ímam á norskan spítala

Haukeland-háskólasjúkrahúsið í Bergen verður fyrsta sjúkrahúsið í Noregi sem ræður til starfa ímam, það er leiðtoga múslima. Til að byrja með verður ímaminn í 20 prósenta starfi í eitt ár. Hann fær greitt af því fjármagni sem ætlað er til þjónustu presta við sjúkrahúsið.

Á mörgum öðrum norskum sjúkrahúsum starfa svokallaðir menningarráðgjafar sem sinna meðal annars ýmsum verkefnum ímams. Menningarráðgjafarnir eiga að veita starfsmönnum upplýsingar sem þeir þurfa á að halda í samskiptum við sjúklinga frá öðrum menningarheimi og með aðrar lífsskoðanir.