Von á djúpri lægð á morgun

Óveðri er spáð syðst á landinu á morgun. Ágætis vetrarveður, með tilheyrandi hægum vindi, verður þó víðsvegar á landinu í dag, að því er fram kemur í hugleiðingum veðurfræðings á vef Veðurstofu Íslands.

Á morgun mun djúp lægð taka sér bólfestu suður af landi og mun að öllum líkindum valda staðbundnu óveðri syðst á landinu og með ströndinni að Öræfajökli. Gert er ráð fyrir 20-28 m/s meðalvindi og snjókomu eða slyddu með köflum.

Þá tekur veðurfræðingur sérstaklega fram að óveðrið á morgun verði svipað og það sem gerði 2. janúar síðastliðinn. Þá var vegum lokað þegar verst lét og strandaglópar söfnuðust saman á Vík í Mýrdal. Gert er ráð fyrir að veður verði öllu skárra annars staðar á landinu á morgun.

Í dag er útlit fyrir ágætis vetrarveður á landinu með hægum vindi og bjartviðri. Á Norðurlandi er þó spáð ofankomu og töluverðum vindi. Þá gæti frostið slagað í tveggja stafa tölu í flestum landshlutum í dag.

Veðurhorfur á landinu næstu daga:

Í dag:

Norðlæg átt 8-13 m/s norðantil á landinu og snjókoma eða él, en hægari vindur og víða bjartviðri annars staðar. Frost 1 til 10 stig. 

Vaxandi austanátt á morgun, víða 10-18 m/s síðdegis en 20-28 syðst á landinu og með ströndinni að Öræfajökli. Snjókoma eða slydda suðaustanlands, en skýjað og úrkomulítið í öðrum landshlutum. Hiti kringum frostmark um landið sunnanvert og minnkandi frost fyrir norðan.

Á mánudag:

Austan 13-18, en 20-28 syðst fram eftir degi. Hægari vindur um landið NA-vert. Snjókoma og síðar slydda eða rigning, einkum SA-lands, en dálítil él og vægt frost N-til á landinu.

Á þriðjudag:

Austan 10-18 og slydda eða rigning við N- og NA-ströndina, annars mun hægari og dálítil él. Hiti kringum frostmark, en frost 1 til 5 stig inn til landsins.

Á miðvikudag:

Norðaustan 8-15 og él fyrir norðan og austan, en bjart sunnan heiða. Frost 0 til 4 stig.

Á fimmtudag:

Minnkandi norðanátt og víða léttskýjað, en dálítil él norðaustantil á landinu. Kólnandi veður.

Á föstudag:

Útlit fyrir suðaustanátt með lítilsháttar snjókomu S-lands, en bjartviðri á N- og A-landi.