Puigdemont kominn til Danmerkur

Carles Puigdemont, fyrrverandi forseti héraðsþings Katalóníu, kom til Danmerkur í morgun. Hann hyggst taka þátt í málstofu við Kaupmannahafnarháskóla í dag og funda með dönskum þingmönnum í fyrramálið. DR segir frá.

Heimsókn Puigdemont til Danmerkur er umdeild, en fulltrúar Spánarstjórnar hafa látið hafa það eftir sér að endurnýja ætti alþjóðlega handtökuskipun á hendur honum, sem áður hafði verið dregin til baka.

Hann hefur hafist við í Brussel síðustu vikurnar eftir að spænsk yfirvöld gáfu út handtökuskipun á hendur honum í kjölfar sjálfstæðisyfirlýsingar katalónska þingsins.

Tók flug Ryanair

Forsetinn fyrrverandi tók morgunflug Ryanair frá Charleroi í Belgíu til Kastrup-flugvallar.

Spánarstjórn leysti upp katalónska héraðsþingið síðla árs í fyrra eftir að það samþykkti að lýsa yfir sjálfstæði.

Var í kjölfarið boðað til nýrra kosninga til héraðsþingsins þar sem aðskilnaðarsinnar náðu naumum meirihluta. Aðskilnaðarsinnar vilja að Puigdemont verði áfram forseti héraðsþingsins og hefur hann sagst reiðubúinn að stýra héraðinu frá Brussel. Þessu hefur Spánarstjórn hafnað.