Tiger átta höggum á eftir fremsta manni

Tiger Woods var ekki ánægður með frammistöðuna á þriðja keppnishring Farmers Insurance mótsins á PGA-mótaröðinni. Hann spilaði á tveimur höggum yfir pari og er á þremur undir samtals - átta höggum á eftir forystumanninum, Alex Noren frá Svíþjóð.

Þetta er fyrsta PGA-mót Tigers í ár en erfið meiðsli hafa sett strik í reikninginn hjá þessum magnaða kylfingi sem á fjórtán risamótstitla á ferlinum.

Hann lenti í talsverðum vandræðum með upphafshöggið sitt en hann hitti braut í aðeins þremur af fjórtán skiptum. Hann náði þó að setja niður mörg mikilvæg pútt.

„Þetta var ljótt,“ sagði Tiger við fjölmiðla eftir hringinn sinn í gær. „Tilfinningin fyrir spilamennskunni er allt önnur. Það er eitthvað sem ég verð að venjast.“

Woods hefur farið í fjórar aðgerðir vegna meiðsla í baki síðustu fjögur árin.

Sýnt verður beint frá lokahring mótsins á Golfstöðinni klukkan 18.00 í kvöld.