PSG stelur Morros af Barcelona

Franska stórliðið PSG tilkynnti í dag að það væri búið að semja við spænska landsliðsmanninn Viran Morros til tveggja ára.

Hann mun ganga í raðir félagsins frá Barcelona næsta sumar. Morros mun styrkja lið PSG mikið og það mun að sama skapi veikja lið Barcelona að sjá á bak þessum lykilmanni.

Morros er orðinn 34 ára gamall og hefur leikið með Barcelona síðan 2011. Þetta verður í fyrsta sinn á ferlinum sem hann leikur utan Spánar.

Þessi tæplega tveggja metra leikmaður hefur fimm sinnum verið valinn besti varnarmaður spænsku deildarinnar. Hann vann Meistaradeildina tvisvar með Ciudad Real og einu sinni með Barcelona.