Fyrir og eftir myndir af nýuppgerðum veitingastað í Keflavík

Fyrir 6 mánuðum síðan ákváðu stjórnendur Radison Park Inn hótelsins í Keflavík að leita til Arnars Gauta og Jóns Gunnars Geirdal varðandi breytingar á veitingastað hótelsins sem þá hét Vocal.

Hönnun og hugmyndavinna fór strax af stað og með algjöru trausti og framtíðarsýn stjórnenda hótelsins var lagt upp með gjörbreyttu útliti og nýjum áherslum. Frá upphafi kom nýja nafnið á staðnum LiBRARY aðeins til greina og skilgreindi mikið til hvernig loka útkoman yrði, á árum áður var bókasafn Keflavíkur í húsinu og þar af leiðandi skemmtileg tenging fyrir heimamenn á Suðurnesjum.

Það var mikið lagt í þennan nýja stað hvað varðar húsgögn ofl.  Smíðaður var nýr mun stærri bar inn í rýmið ásamt nýju gólfefni sem lagt var yfir þungar flísar og skapaði það strax notalega stemningu. Öll húshögn koma frá Húsgagnahöllinni og eru þau frá Dialma Brown á Ítalíu.

„Ég ákvað strax frá upphafi að nota aðeins húsgögn frá Dialma Brown þar sem þau pössuðu einnig mjög vel við umhverfisstefnu hótelssins,” segir Arnar Gauti. Dialma Brown notar að mestu endurunnin við og leður í framleiðslu sína.

Viðurinn í flestum borðunum er 80 til 100 ára gamall og er safnað saman frá gömlum húsum og byggingum á ítalíu sem er verið að rífa. Dialma Brown kaupir viðinn og vinnur hann þannig að útkoman nær þessu raunverulega rústik útliti.

Hér að neðan má sjá fyrir og eftir myndir af staðnum og ferlinu.