Birtu myndband af flótta hermannsins frá Norður-Kóreu

Sameinuðu þjóðirnar hafa birt myndband sem sýnir dramatískan flótta hermanns frá Norður-Kóreu yfir landamærin til Suður-Kóreu. Á myndbandinu má sjá hve nálægt því hann var að vera handsamaður og að annar hermaður Norður-Kóreu braut gegn vopnahléi ríkjanna þegar hann elti flóttamanninn yfir landamærin þann 13. nóvember.

Afar sjaldgæft er að einhverjir frá Norður-Kóreu flýi yfir sameiginlegt öryggissvæði ríkjanna (JSA) á landamærunum. Tíu ár eru síðan það gerðist síðast.

Þegar myndbandið byrjar má sjá hermanninn keyra herjeppa í átt að landamærunum. Hann fer í gegnum fyrsta öryggishliðið og má sjá hermann skjóta á eftir honum. 

Hermaðurinn keyrir svo út af veginum og festir bílinn. Þegar hermenn Norður-Kóreu hlaupa að honum hleypur hermaðurinn á brott með hermennina á hælunum. Þeir skjóta á hann og hitta hann minnst fjórum sinnum. Honum tókst þó að komast yfir landamærin þar sem hann féll í jörðina.

Einn hermaður Norður-Kóreu elti hann yfir landamærin en sneri þó við. Skömmu seinna má sjá tvo hermenn Suður-Kóreu skríða að hermanninum og draga hann í skjól. Hann hefur nú gengið í gegnum þó nokkrar skurðaðgerðir og er sagður úr lífshættu.

Sjá einnig: Hermaðurinn vaknaður og horfir á suðurkóreskar kvikmyndir

Hér að neðan má sjá tvær útgáfur af myndbandinu. Sú efri hefur verið stytt og útskýringum bætt við. Hin neðri er upprunaleg útgáfa.