Þórdís Elva vonar að karlmenn taki næsta skref

„Ég held að við munum tala um „fyrir“ og „eftir“  #meetoo herferðina,“ segir Þórdís Elva Þorvaldsdóttir í viðtali við USA Today. Þar segir hún að Weinstein málið hafi verið mikill snúningspunktur og að áhrifin vegna #metoo hafi verið gríðarleg. Í viðtalinu er einnig rætt við Tom Stranger, manninn sem nauðgaði Þórdísi Elvu þegar hún var 16 ára. Þau stigu fram saman fyrr á þessu ári og gáfu út bókina Handan fyrirgefningar.

Tom segir að hann sé spenntur að sjá hvernig þessi umræða hafi á hegðun fólks í valdastöðu. „Ég vil sjá hvernig þetta verður úti á götu. Ég velti fyrir mér hvernig þetta verður fyrir konur og karla á vinnustöðum og gangandi á almannafæri.“

Líka skaðlegt körlum

Aðspurð hvernig hægt sé að fá menn til að taka ábyrgð á ofbeldinu sem þeir fremja svaraði Þórdís: „Það er almennt þekkingarleysi á meðal manna um það hvernig karlamenningin sem stuðli að ofbeldi gegn konum, sé einnig skaðlegt fyrir karlana.“

Þórdís segir að mörgum karlmönnum séu kenndar þær lygar að það sé í lagi að vera ágengur við konur, grípa í þær og koma með kynferðislegar athugasemdir

„Ef fleiri menn áttuðu sig á því að svona hegðun er skaðleg fyrir alla, karla eins og konur, tel ég að fleiri menn myndu sjá mikilvægi þess að taka ábyrgð til að uppræta hana.“

Þau virðast bæði sammála um að kannski sé Facebook ekki rétti staðurinn til þess að stíga fram og játa kynferðisofbeldi. „Ég myndi frekar vilja að menn einfaldlega breyttu hegðun sinni og reyndu að fá mennina í kringum sig til þess að gera það líka, að opna augun og átta sig á því hvernig þeir gætu verið hluti af vandamálinu.“

Tom segir að slíkar játningar snúist margar of mikið um gerandann og hans skömm. „Ég get tengt við þetta  - þetta er hluti af minni sögu. Þegar ég talaði fyrst við Þórdísi einblíndi ég á mína skömm og hvað ég skammaðist mín fyrir mig í stað þess að skammast mín fyrir sársaukann sem ég olli Þordísi. Kannski er ekki besta leiðin að játa opinberlega.“

Karlarnir taki næsta skref

Að mati Þórdísar Elvu hefur #metoo herferðin verið svona árangursmikil vegna þess að hún er frá sjónarhorni þolenda og styrki þá sem hafa þagað og borið skömmina. Hún segir að það gæti verið að fegurð og frægð þeirra sem sökuðu Weinstein um kynferðisofbeldi hafi átt þátt í því að málið vakti svo mikla athygli.

Þórdís Elva á þó ekki von á því að breytingin sem hefur orðið í umræðunni gangi til baka, þrátt fyrir að margir upplifi að þeim standi ógn af þessari umræðu. „Það er auðvitað einn hluti af viðbrögðunum við stórum breytingum í sögunni. Það er alltaf mótstaða.“

Vonar hún að næsta skref komi frá karlmönnum. „Ég myndi vilja að næsta skrefið væri að karlmenn kæmu saman og segðu „Þetta er hræðilegt, við getum gert betur en þetta, við viljum ekki að þessi menning viðgangist og við ætlum að taka ábyrgð á þeim breytingum sem þurfa að eiga sér stað.“

Þórdís og Tom hafa haldið TED-fyrirlestur saman en hann má horfa á í spilaranum hér að neðan.