Kara Kristel hefur ekki enn sagt grófustu kynlífssögurnar

Kara Kristel Ágústsdóttir hefur vakið töluverða athygli eftir að hún hóf að rita pistla á bloggsíðunni sinni þar sem hún tjáir sig opinskátt um kynlífið sitt. Hún hefur einnig verið reglulegur gestur í Brennsluna á FM957. Fjallað var um Köru í Íslandi í dag í gærkvöldi en hún fékk hugmyndina um kynlífsblogg í sumar.

„Í september veikist ég töluvert og þurfti að taka því rólega. Ég á mjög erfitt með að taka því rólega og er frekar ofvirk,“ segir Kara sem fór því næst í bókabúð og ákvað að kaupa sér bókina Fifty Shades of Grey.

„Ég fer að lesa hana og geri það tvö kvöld í röð. Þegar ég er komin á blaðsíðu 90 er enn ekkert farið að gerast og ég varð bara frekar pirruð. Það var ekkert gaman að lesa þetta. Sögurnar sem ég hef verið að segja vinum mínum síðustu ár eru mun betri og ég er alveg með gott safn af góðum sögum,“ segir Kara sem byrjaði að skrifa sögur fyrir vini sína og sýndi ekki opinberlega.

„Ég á afmæli sjötta október og ákvað á afmælisdaginn minn að opna þetta blogg, því þetta er eitthvað sem fólk nennir að lesa. Sögurnar eru frekar ítarlegar og persónulegar en ég fer ekki alveg út í það grófasta.“

Hún hefur látið einn karlmann heyra það fyrir að vera lélegur í rúminu á bloggsíðu sinni.

„Ég er búinn að ræða þetta mikið við hann og honum finnst þetta bara mjög fyndið. Ég talaði mikið niður til hans, en hann hafði samband við mig eftir viðtalið við Hjörvar og Kjartan og sagði að viðtalið hefði bara verið algjör snilld.“

Kara segist hafa fengið rosalega mikil viðbrögð eftir að byrjað var að fjalla um hana í fjölmiðlum.

„Þetta var í raun bara djók. Ég ætlaði ekkert að vera halda uppi ótrúlega stóru kynlífsbloggi og ég á ekki einu sinni tölvu og stjórna þessu öllu í símanum.“

Hér að neðan má sjá umfjöllun Íslands í dag frá því í gærkvöldi.