Anna Fríða kom óvart upp um Bílabarinn

Óhætt er að segja að það hafi vakið mikla athygli og undrun þegar Anna Fríða Gísladóttir, markaðsstjóri Domino’s, fór með glös í litun á réttingarverkstæðið Bílabarinn á Hamarshöfða. Þegar hún stökk út úr bíl sínum og gekk í átt að verkstæðinu varð hún í meira lagi hissa. Þar stóð grár WV Golf, áþekkur hennar eigin gráa WV Golf, með sama bílnúmer.

Fjallað var um málið á Vísi í gær en Anna Fríða tilkynnti málið bæði til lögreglu og Samgöngustofu. Þórhildur Elínardóttir, upplýsingafulltrúi Samgöngustofu, segir í samtali við Vísi að auðvitað standist ekki að tveir bílar séu á sömu númerum. Málið hafi verið kannað án tafar þegar það kom upp í gær.

„Í ljós kom að tilteknu réttingaverkstæði hafði láðst að farga ónýtum númeraplötum eins og skylt er. Höfðu þær þess í stað verið notaðar á kyrrstætt ökutæki sem beið eftir viðgerð hjá verkstæðinu svo það fengi að vera í friði í götunni,“ segir Þórhildur í skriflegu svari til fréttastofu.

„Þetta er að sjálfsögðu óheimilt og hefur Samgöngustofa áréttað það. Eigendur verkstæðisins segjast nú hafa fjarlægt og fargað númerunum.“

Starfsmaður Bílabarsins sem fréttamaður náði tali af sagðist ekki þekkja til málsins og vísaði á eigandann Hinrik Þráinsson. Ekki náðist í Hinrik við vinnslu fréttarinnar.

Uppfært klukkan 09:29

Í fyrri útgáfu fréttarinnar mátti sjá Twitter færslu markaðsstjórans sem vakti mikla athygli og umræðu. Anna Fríða hefur nú læst aðgangi sínum á Twitter og birtist hún því ekki lengur.

Þetta er það skrítnasta sem ég hef lent í! ?? pic.twitter.com/xD4ZL3RDpA

— Anna Fríða (@AnnaFridaGisla) November 1, 2017