Sextán stiga hiti í nótt

Suðvestanstormur herjar á landið framan af morgni og rignir víða, en dregur síðan talsvert úr vind og úrkomu. Þó verður áfram stormur á Suðausturlandi fram undir kvöld.

„Óvenju hlýtt loft leikur um landið bláa og fór hiti til að mynda í tæp 16 stig á Eskifirði í nótt,“ segir veðurfræðingur Veðurstofunnar og bætir við að hitinn verði á bilinu 3 til 12 stig, hlýjast á Austurlandi.

Það leggst í norðankalda á morgun og kólnar þá talsvert, einkum fyrir norðan. Skýjað með köflum á Norður- og Austurlandi og él á stöku stað, en léttir til fyrir sunnan og vestan og frystir víða um kvöldið.

Áfram fínasta haustveður á sunnudag, en eftir helgi býst Veðurstofan við dæmigerðum haust-lægðagangi.

Veðurhorfur á landinu næstu daga

Á laugardag:

Norðan og norðvestan 8-13 m/s. Skýjað á N- og A-landi og dálítil él við ströndina, en annars léttskýjað. Kólnandi veður og frost víða 0 til 5 stig um kvöldið, en frostlaust SV-til.

Á sunnudag:

Hægviðri, yfirleitt léttskýjað með hita kringum frostmark framan af degi, en síðan suðaustan 8-13 m/s, þykknar upp SV-lands og hlýnar.

Á mánudag:

Hæg breytileg átt og dálítil vætu öðru hvoru, en þurrt að mestu NA-lands. Hiti 3 til 9 stig, mildast V-til.

Á þriðjudag:

Vestlæg átt, milt veður og dálítil rigning, en snýst til norðanáttar síðdegis með slyddu eða snjókomu fyrir norðan, en birtir til syðra og kólar í veðri.

Á miðvikudag:

Norðanstrekkingur og él A-lands, en annars mun hægari og léttskýjað. Talsvert frost á öllu landinu.

Á fimmtudag:

Útlit fyrir suðvestanátt með slyddu eða rigningu og hlýnandi veðri.