Tröll herja á fórnarlömb skotárásarinnar í Vegas

Fólk sem lifði af mannskæðustu skotárás nútímasögu Bandaríkjanna í Las Vegas í byrjun mánaðarins, situr nú undir hótunum nettrölla sem halda að fjöldamorðið hafi ekki gerst í alvörunni. Fjölskyldur fólks sem dó í árásinni hafa einnig orðið fyrir árásum. Umrædd tröll virðast halda að fórnarlömbin séu eingöngu leikarar sem yfirvöld hafi ráðið til að láta líta út fyrir að árás hefði verið gerð. Þannig væri hægt að herða reglur varðandi byssueign í Bandaríkjunum.

Eftirlifendunum og fólki sem særðist hefur jafnvel verið hótað dauða.

Stephen Paddock myrti 58 manns og særði hundruðir í Las Vegas þann 1. október þegar hann skaut úr glugga hótelherbergis síns á 23. hæð á tónlistarhátíðargesti hinu megin við götuna.

Sjá einnig: Hömlulaust ofbeldi í borgr syndanna

Einn þeirra er Kanadabúinn Braden Matejka. Hann fékk skot í hnakkann en lifði það af og var kominn á fætur nokkrum dögum síðar. Hann hefur þurft að loka öllum samfélagsmiðlum sínum og myndir af honum hafa verið í dreifingu á milli tröllanna.

Braden ræddi við blaðamann AP fréttaveitunnar nokkrum dögum eftir árásina.

Braden þjáist þó af miklum bólgum í höfðinu, blæðingum og skertri sjón í kjölfar þess að hafa fengið skotið í hnakkan. Stofnuð var hópfjáröflunarsíða til að hjálpa til við greiðslu kostnaðar vegna læknismeðferðar.

Það tók ekki langa stund þar til tröllin voru mætt. Þau fóru að skrifa á söfnunarsíðuna að Braden væri hræðileg manneskja fyrir að vera að nýta sér þetta samsæri til að græða peninga og jafnvel hóta honum lífláti.

„Þú ert lyginn drullusokkur og ég vonast til þess að einhver skjóti þig raunverulega í höfuðið,“ skrifaði einn á Facebooksíðu hans. „Sál þín er ógeðsleg og myrk. Þú munt borga fyrir þetta,“ skrifaði annar.

Á endanum lokaði Braden samfélagsmiðlum sínum, en tröllin tóku því eingöngu sem staðfestingu á því að þau hefðu rétt fyrir sér.

Mætt með reiði og hatri

Bróðir Matejka, Taylor, ræddi við blaðamann Guardian í síðustu viku og sýndi honum skjáskot af skilaboðum sem bæði Braden og fjölskyldumeðlimum hans hafa borist. Hann hefur jafnvel verið sakaður um að hafa skipulagt hið meinta samsæri.

„Hér erum við að tala um fjölskyldur sem eru líklega að eiga við það erfiðasta sem þær munu eiga við. Þeim er mætt með reiði og hatri og ráðist er á þær á netinu fyrir að eiga að vera aðilar að einhverju samsæri,“ sagði Taylor við Guardian.

„Þetta er brjálæði. Ég get ekki ímyndað mér hvernig þetta fólk hugsar. Veit það að við erum raunverulegar manneskjur.“

Í fréttinni kemur einnig fram að aðrir sem lifðu árásina af og fjölskyldur fólks sem dó hafi einnig orðið fyrir fjölmörgum árásum.

Rob McIntosh, sem fékk skot í hendina og bringuna, segist vera mjög reiður yfir árásunum.

„Maður er þegar búinn að fara í gegnum mikið áfall og hræðilega lífsreynslu og svo er einhver að ráðast á heiðarleika þinn. Maður fær ekki einu sinni færi á því að svara fyrir sig.“

Hefur barist gegn tröllum í fimm ár

Lenny Pozner hefur varið fimm árum í að berjast gegn umræddum nettröllum sem hafa herjað á hann eftir að sex ára sonur hans var skotinn til bana í Sandy Hook fjöldamorðinu. 

Því hefur verið haldið fram að Noah Pozner hafi aldrei verið til og að Lenny sé leikari sem hafi fengið greitt fyrir að þykjast hafa misst ímyndaðan son sinn. 

Á fimm árum hefur Pozner ítrekað fengið hótanir. Honum hefur verið hótað dauða og að meðal annars að réttast væri að drekkja honum í kúk.

Pozner ræddi við Anderson Cooper hjá CNN í desember í fyrra eftir að kona sem hafði hótað honum var ákærð.

Konan sem var ákærð er frá Flórída. Hún heitir Lucy Richards og er 57 ára gömul. Nú í sumar játaði hún að hafa hótað Pozner og var dæmd í fimm mánaða fangelsi og þar að auki fimm mánaða stofufangelsi. Dómnum fylgdi einnig fimm ára skilorð og má hún ekki heimsækja síður á netinu þar sem samsæriskenningum er dreift.

Hún hafði hringt í Pozner eftir að hafa lesið um hið meinta samsæri í Sandy Hook á netinu og skildi eftir fjögur skilaboð á símsvara hans.

Lögmaður hennar sagði einnig eftir réttarhöldin að hann hefði fengið fjölda símtala frá gervöllum Bandaríkjunum þar sem fólk reyndi að útskýra fyrir honum að Sandy Hook fjöldamorðið hefði verið samsæri.

Samfélagsmiðlar auka áhrifin

Samsæriskenningar sem þessar eru ekki nýjar af nálinni. Hins vegar hafa samfélagsmiðlar og myndbandaveitur aukið áhrif þeirra og dreifingu. Þar að auki gera þeir hinum svokölluðu tröllum auðveldara að finna fórnarlömb sín og áreita þau.