Hringvegurinn lokaður á tveimur stöðum

Búið er að loka fyrir alla umferð yfir brúna á þjóðvegi 1 yfir Steinavötn í Suðursveit. Þetta kemur fram í tilkynningu frá lögreglunni á Suðurlandi en mælst hefur sig á brúargólfi frá síðustu athugun svo rétt þykir að loka fyrir alla umferð yfir brúna.

 

Miklir vatnavextir hafa verið á Suðausturlandi í gær og í dag vegna gríðarlegrar úrkomu. Þannig var þjóðvegi 1 loka á vegakafla milli Hoffellsár og Flateyjar á Mýrum og hefur hann ekki verið opnaður.

Hringvegurinn er því lokaður á tveimur stöðum og segir Oddur Árnason, yfirlögregluþjónn á Suðurlandi, alveg ljóst að hringvegurinn verði lokaður um einhvern tíma.

Verkfræðingar frá Vegagerðinni eru nú á leiðinni austur með þyrlu Landhelgisgæslunnar til að kanna og meta aðstæður á brúnni. Oddur segir að það skýrist væntanlega betur í dag hversu lengi hringvegurinn verði lokaður.

Veðurspáin gerir ráð fyrir að það stytti eitthvað upp fyrir austan í dag en svo á að byrja að rigna strax aftur á morgun.