Kynþokkafyllstu kleinuhringir landsins

Kynþokkafyllstu karlmenn Íslands eru margir með kleinuhring til að draga fram karlmannlegar andlitslínurnar.Margir eiga það sammerkt að gera sér fulla grein fyrir mikilvægi skeggtísku þegar útlitið er annars vegar.

Skeggtíska getur verið með ýmsu móti og helgast af tíðarandanum hverju sinni. Helsta kyntákn sinnar tíðar, Clark Gable, var til að mynda með mjótt yfirvararskegg og þannig má lengi áfram telja.

Þeir karlmenn dagsins í dag sem eru löðrandi í kynþokka eru hins vegar að vinna með kleinuhringinn, sem er sambland af yfirvararskeggi og svo geithafrinum eða hökutoppi.

En, þeir raka hins vegar vangann og bera ekki barta. Eins og glögglega má sjá á meðfylgjandi myndum.

Lífið fór í rannsóknarvinnu með nokkrum sérfræðingum og úr varð listi yfir kynþokkafyllstu kleinuhringi landsins.

Dómnefndina skipa þau: Álfrún Pálsdóttir, ritstjóri Glamour, grínistinn Sólmundur Hólm, blaðamaðurinn Benedikt Bóas Hinriksson og blaðamaðurinn Hulda Hólmkelsdóttir.

Hér að neðan má sjá flottustu karlmenn landsins sem skarta svokölluðum kleinuhring.

Vigfús Bjarni Albertsson

Séra Vigfús Bjarni Albertsson er með fullkominn kleinuhring. Hann hefur snyrt skeggið sitt á þann hátt í mörg ár og var Vigfús fyrstur á listann yfir þá allra kynþokkafyllstu.

Stjörnulögfræðingurinn Sveinn Andri Sveinsson

Sveinn hefur í gegnum tíðina verið með fallegan kleinuhring og bera fáir hann betur. Í dag er hann ekki að vinna með slíka skeggsnyrtingu en hann ætti heldur betur að taka hann upp á ný.

Árangur áfram, ekkert stopp

Framsóknarmaðurinn Gunnar Bragi Sveinsson þekkir kleinuhringinn mjög vel. Skeggið hefur í gegnum tíðina verið einskonar einkennismerki Framsóknarmannsins og ber hann kleinuhringinn ótrúlega vel.

Því miður er Gunnar Bragi ekki með kleinuhring í dag en batnandi mönnum er best að lifa og vex skeggið sem betur fer aftur. 

Grjótharður kleinuhringur

Jón Viðar Jónsson er einn þekktasti leiklistargagnrýnandi landsins. Hann sparar aldrei stóru orðin og hefur greinilega mikið sjálfstraust. Kleinuhringurinn er einfaldlega ástæðan þar sem hann er með einstaklega fallegt skegg.

Euro-hringur

Reynir Þór Eggertsson, betur þekktur sem Euro-Reynir, er einhver allra virtasti Eurovision-sérfræðingur þjóðarinnar. Reynir hefur verið með kleinuhring í mörg herrans ár og gjörsamlega neglir það fyrir allan peninginn.

Guðfaðirinn

Ingólfur Guðbrandsson, tónlistarmaður og ferðamálafrömuður, var í áraraðir með flottasta kleinuhring Íslandssögunnar. Ingólfur lést árið 2009 og kemst hann í frægðarhöll íslenskra kleinuhringja.

Listinn er vissulega ekki tæmandi og komust margir á lista yfir þá allra flottustu. Hér að neðan má sjá mynd af þeim öllum.

Lesendur Vísis geta sent inn myndir af flottum kleinuhringjum í athugasemdarkerfið hér að neðan. 

Öll myndvinnsla er eftir Garðar Kjartansson.