Barcelona hefur eytt meiri pening í leikmenn en Real Madrid

Real Madrid hefur lengi verið í nokkrum sérflokki á Spáni þegar kemur að því að eyða stórum upphæðum í nýja leikmenn. Nú er hinsvegar orðin breyting á því.

Félag eins og Barcelona hefur lengi framleitt hverja stjörnuna á fætur annarri í knattspyrnuakademíu sinni og þá hafa önnur félög grætt mikinn pening á því að kaupa leikmenn ódýrt og selja þá síðan seinna fyrir miklu meiri pening.

Real Madrid hefur á sama tíma slegið metið nokkrum sinnum yfir dýrasta knattspyrnumann heims og á Santiago Bernabeu hafa menn alltaf verið tilbúnir að eyða stórum upphæðum í bestu knattspyrnumenn heimsins.

Real Madrid hefur unnið Meistaradeildina þrisvar sinnum á síðustu fjórum árum á sama tíma og Barcelona hefur „bara“ unnið hana einu sinni. Í vor varð Real Madrid ennfremur fyrsta félagið til að vinna Meistaradeildina tvö ár í röð.

Það kemur því nokkuð á óvart að Barcelona hefur eytt meiri peningum í nýja leikmenn en Real Madrid frá sumrinu 2013. Barcelona er ofar en Real í eyðslu þrátt fyrir að Börsungar séu ekki enn byrjaðir að eyða þeim 200 milljónum punda sem þeir fengu fyrir Brasilíumanninn Neymar.

Það fylgir reyndar sögunni að Real Madrid er líka að eyða stórum upphæðum í nýja leikmenn en aðalbreytingin er kannski hversu miklu meiri peningur hefur farið í nýja leikmenn hjá Barcelona á síðustu árum en þegar næstum því allir leikmenn liðsins komu upp í gegnum unglingastarfið.

Á undanförnum fjórum árum hefur Barcelona eytt 4 milljónum evra meira í nýja leikmenn en Real Madrid. Sú upphæð gæti síðan hækkað um meira en hundrað milljónir evra kaupi Barcelona annaðhvort Ousmane Dembele eða Philippe Coutinho áður en félagsskiptaglugginn lokar í lok mánaðarins.