Garðurinn hans Bubba toppar garð skrúðgarðyrkjumeistara

Kolbeinn Tumi Daðason skrifar 5. júlí 2017 10:45

Bubbi bregður á leik við opnun Norðurár fyrir tveimur árum. Hann veiðir töluvert af urriða í Meðalfellsvatni. Vísir/GVA

Tónlistarmanninum Bubba Morthens er ýmislegt til lista lagt. Það hlýtur að vera niðurstaða þeirra sem hafa horft á myndband sem Bubbi birti á Facebook-síðu sinni sem sýnir fólki hve vel hann hefur tekið til hendinni í garðinum sínum.

Bubbi býr sem kunnugt er ásamt Hrafnhildi Hafsteinsdóttur, eiginkonu sinni, við Meðalfellsvatn í Kjósinni en í myndbandinu segist hann ætla að sýna fylgjendum sínum á Facebook hvað sumarið sé búið að vera geggjað.

Í garðinum hans Bubba má finna rósir úti um allt, skrautrósir, Harisons’s Yellow, og er einn rósarunninn þannig plantaður til að fá rósalykt inn um svefnherbergisgluggann. Reiknar Bubbi með því að þær springi út eftir um hálfan mánuð.

„Sem er alveg fílingur,“ segir Bubbi í myndbandinu.

Burknaland í vinnslu

Bubbi er byrjaður að planta litlum burknum í hluta garðsins þar sem hann ætlar að búa til lítið burknaland. Þá er að finna myntugarð og „sjúkrahúsið“, þangað sem Bubbi setur blóm sem hafa átt í basli og hann veit ekki alveg hver næstu skref eiga að vera.

Jarðaber er að finna í garðinum og sömuleiðis hænur en Bubbi lýsir öllu saman langbest sjálfur í myndbandinu að neðan.

Á fjórða þúsund manns hafa kíkt á myndbandið og rignir hrósi yfir tónlistarmanninn orkumikla. Garðyrkjumeistarinn Jóhann Helgi Hlöðversson er sáttur með sinn mann.

„Ég er skrúðgarðyrkjumeistari Bubbi Morthens en á ekki svona flottan garð! Þú mátt eiga það að þú ert með gríðarlega orku og skapandi hug, áræðni, dugnað og hæfileika á mörgum sviðum. Lífið líður hratt og við komum og förum! Þér var gefin stærri rafgeymir en flestum öðrum og þú nýtir hann vel! Til hamingju með þig og þína og hvernig þú ræktar garðinn þinn!“ segir Jóhann Helgi.

Tónlist

Tengdar fréttir

Bubbi og Hrafnhildur selja á Nesinu

Bubbi Morthens og Hrafnhildur Hafsteinsdóttir eru búin að setja íbúð sína að Skerjabraut á Seltjarnarnesi á sölu. Íbúðin er ekki nema rúmlega 70 fermetrar og má því ætla að nokkuð þröngt hafi verið í búi. Hún er þó öll nýuppgerð og smekklega innréttuð.

14. ágúst 2007 09:40