Chelsea á von á tilboði frá Atletico

Samkvæmt heimildum Sky Sports þá mun Atletico Madrid gera Chelsea tilboð í framherjann Diego Costa í vikunni.

Atletico ætlaði sér að kaupa Alexandre Lacazette frá Lyon en ekkert varð úr því þar sem félagið má ekki nota nýja leikmenn fyrr en í janúar.

Því hefur liðið ákveðið að beina spjótum sínum að Costa sem lék með félaginu áður en hann fór til Chelsea. Costa hefur áhuga á því að fara til Atletico þó svo hann geti ekki byrjað að spila með liðinu fyrr en í janúar.

Einn möguleiki í stöðunni er sá að lána Costa til félags í Kína fram að áramótum. Atletico fengi mikinn pening fyrir það.

Þó svo Costa hafi verið markahæsti leikmaður Chelsea á síðustu leiktíð þá er hann til sölu.