Akraborgin siglir á ný

Flóasiglingar á milli Akraneskaupstaðar og Reykjavíkur hófust á ný nú í kvöld, á vegum Sæfara, eftir 19 ára hlé. Akraborgin sigldi jómfrúarsiglinguna um sjöleytið í kvöld og var margmenni um borð en ferðin tekur einungis 25 mínútur. Um sex mánaða tilraunaverkefni er að ræða. 

Heimir Már Pétursson, fréttamaður Stöðvar 2, var á staðnum og heyrði í Degi B. Eggertssyni, borgarstjóra Reykjavíkur og Rakel Óskarsdóttur, bæjarfulltrúa á Akranesi, sem voru afar ánægð með verkefnið.

„Rosalega margir skagamenn sem vinna í Reykjavík og hugsa sér gott til glóðarinnar nú, því það tekur klukkustund að keyra til Reykjavíkur en einungis 25 mínútur með ferjunni,“ segir Rakel sem segir að þetta sé tilvalið tækifæri fyrir ferðamenn til þess að heimsækja Akranes.

Spurður hvort að verkefnið geti ekki haldið áfram til frambúðar og lengur en sex mánuði segir Dagur það velta á eftirspurninni. 

„Við beinum því bara til fólks að nýta sér þetta. Þá kemur eitthvað skemmtilegt út úr tilrauninni og kannski er framtíðin sú að tengja hverfi innan borgarinnar eða fleiri staði með bátastrætó.“

Þá segir Gunnlaugur Grettisson, framkvæmdastjóri Sæferða, að skipið sem sigli á milli sé draumaskip og sigli hratt yfir en siglt verður þrisvar á dag á milli staða.

Siglingum var hætt á milli Akraness og Reykjavíkur árið 1998 með tilkomu Hvalfjarðarganganna. Fram að því hafði Akraborgin, eins og síðasti flóabáturinn var kallaður, siglt með farþega á milli bæjarfélaganna við miklar vinsældir.

Líkt og sjá má á meðfylgjandi myndum var kátt í hjalla þegar Akraborgin sigldi úr höfn frá Reykjavík og mikið af fólki.

Sjá má stemninguna á Akranesi í spilaranum hér að ofan.