Mark Arons dugði skammt

Aron Sigurðarson hélt upp á það að vera valinn í íslenska landsliðshópinn sem mætir Króatíu með því að skora í leik Tromsö og Vålerenga í norsku úrvalsdeildinni í dag. Mark Arons dugði þó skammt því Tromsö tapaði leiknum 2-4.

Þetta var annað mark Arons í síðustu fjórum deildarleikjum. Hann hefur einnig gefið tvær stoðsendingar á tímabilinu.

Vålerenga byrjaði leikinn af gríðarlega miklum krafti og staðan var orðin 0-4 eftir 25 mínútur.

Tromsö skoraði tvö sárabótarmörk í seinni hálfleik en sigur Vålerenga var ekki í hættu.

Aron og félagar sitja í 11. sæti deildarinnar.