Glódís Perla lagði upp mark í fimmta sigurleiknum í röð

Íslenski landsliðsmiðvörðurinn Glódís Perla Viggósdóttir og félagar hennar í Eskilstuna United héldu sigurgöngu sinni áfram í sænsku úrvalsdeildinni í kvöld.

Eskilstuna United vann þá 4-1 heimasigur á Kvarnsveden og hefur þar með unnið fimm leiki í röð eftir jafntefli í fyrstu umferðinni.

Eskilstuna United er í toppsæti deildarinnar með eins stigs forskot á Linköping sem vann 5-1 stórsigur á Gautaborg í sínum leik í kvöld.

Glódís Perla Viggósdóttir spilaði að venju í þriggja manna vörn Eskilstuna en hún lét líka til sín taka í sóknarleiknum.

Mimmi Larsson kom Eskilstuna í 1-0 á 28. mínútu eftir stoðsendingu frá Glódísi Perlu.

Olivia Schough skoraði síðan beint úr aukaspyrnu á 41. mínútu og kom Eskilstuna í 2-0.

Mimmi Larsson bætti síðan við tveimur mörkum í seinni hálfleiknum og innsiglaði þrennuna.

Eskilstuna fékk reyndar á sig mark þremur mínútum fyrir leikslok en liðið var þá á góðri leið með að halda marki sínu hreinu þriðja leikinn í röð.