Aron tryggði Tromsö sigur á meisturunum

Aron Sigurðarson skoraði sigurmark Tromsö þegar liðið vann Rosenborg, 1-2, á útivelli í norsku úrvalsdeildinni í fótbolta í kvöld.

Tromsö varð þar með fyrsta liðið á tímabilinu til að vinna Rosenborg sem hefur orðið norskur meistari undanfarin tvö ár.

Matthías Vilhjálmsson var í byrjunarliði Rosenborg og hann kom liðinu yfir á 20. mínútu. Þetta var annað mark Matthíasar á tímabilinu.

Gestirnir frá Tromsö gáfust ekki upp og Mikael Ingebrigtsen jafnaði metin mínútu fyrir hálfleik.

Fimm mínútum fyrir leikslok skoraði Aron svo sigurmark Tromsö. Þetta var fyrsta mark Fjölnismannsins á tímabilinu og það gat ekki komið á betri tíma.

Eftir sigurinn er Tromsö í 9. sæti deildarinnar með 12 stig. Rosenborg er áfram á toppnum en núna aðeins tveimur stigum á undan Odds Ballklubb sem er í 2. sæti.

Gunnhildur Yrsa Jónsdóttir var einnig á skotskónum í norsku kvennadeildinni.

Garðbæingurinn skoraði þá fyrra mark Vålerenga í 0-2 útisigri á Kolbotn. Gunnhildur Yrsa og stöllur hennar eru í 5. sæti deildarinnar.