Nokkuð borið á skemmdarverkum á Suðurnesjum

Nokkuð hefur borið á skemmdarverkum á Suðurnesjum á undanförnum dögum. Til dæmis voru spellvirki unnin á tveimur bílum sem stóðu inni í porti í Keflavík og fundust inni í þeim báðum steinhnullungar sem notaðir voru til að brjóta rúðurnar. Annar bíllinn var mikið skemmdur.

Þá var brotist inn í listasmiðju á Ásbrú og málningarfötum kastað af millilofti niður á gólf. Einnig hafði verið tæmt úr slökkvitæki á gólfið ásamt því sem kveikt var í blaðahrúgu. Degi síðar var brotist inn í húsnæði við hliðina og kveikt í ruslahrúgu á gólfinu.

Málin eru í rannsókn lögreglunnar á Suðurnesjum.