Mini-Mourinho valinn þjálfari ársins í Þýskalandi

Julian Nagelsmann hefur verið valinn þjálfari ársins í Þýskalandi.

Þessi 29 ára gamli þjálfari hefur gert afar góða hluti með Hoffenheim eftir að hann tók við liðinu í febrúar í fyrra.

Undir stjórn Nagelsmann bjargaði Hoffenheim sér frá falli á síðasta tímabili og á þessu tímabili hefur liðið komið skemmtilega á óvart.

Hoffenheim situr núna í 4. sæti þýsku úrvalsdeildarinnar sem gefur sæti í umspili um sæti í Meistaradeild Evrópu.

Hoffenheim var taplaust í fyrstu 17 leikjum tímabilsins og hefur aðeins tapað tveimur leikjum í vetur. Aðeins Bayern München hefur tapað færri leikjum en Hoffenheim í þýsku deildinni.

Nagelsmann þykir gríðarlega efnilegur þjálfari en hann hefur m.a. fengið viðurnefnið Mini-Mourinho.