Erlent

Samsæriskenning rataði úr útvarpi á Twitter-síðu forsetans

Samúel Karl Ólason skrifar
Donald Trump, forseti Bandaríkjanna.
Donald Trump, forseti Bandaríkjanna. Vísir/EPA
Tíst Donald Trump, forseta Bandaríkjanna, um helgina, þar sem hann sakaði Barack Obama, forvera sinn, um að hlera síma sína hafa valdið miklum usla. Bandamenn Trump og aðrir repúblikanar hafa átt erfitt með að verja yfirlýsingar forsetans, sem hefur gengið skrefinu lengra og farið fram á að þingið rannsaki hvort eitthvað sé til í ásökunum sínum.

Uppákoman hefur þó vakið upp spurningar um hvaðan þær upplýsingar sem enda á Twitter-síðu eins valdamesta manns heims koma.

Í tístum sínum sagðist Trump hafa nýverið komist að því að Obama hefði látið hlera símana í Trump turninum í New York rétt fyrir kosningarnar. Hann sagði ekkert hafa komið út úr hlerununum og að um væri að ræða svokallaðan McCarthyisma.

Þá sagðist hann Obama hafa náð nýjum lægðum og að um sé að ræða mál sem sé sambærilegt við mál Nixon og Watergate hneykslið.

Tístin endaði Trump á því að segja að Obama væri „vondur (eða sjúkur) maður“.

Klukkutíma eftir að hann sagðist hafa komist á snoðir um þessar meintu hleranir sem jafnist á við Watergate hneykslið, tísti Trump um að Arnold Schwarzenegger hefði verið rekinn frá Apprentice þáttunum vegna „lítils (ömurlegs) áhorfs“.

Í þessu samhengi er rétt að minna á að Schwarzenegger neitaði að styðja Trump í forsetakosningunum.

Eftir að byrja daginn í Flórída á áðurnefndum tístum fór Trump í golf.

Talsmaður Obama segir ásakanir Trump vera rangar og það sama gera yfirmaður alríkislögreglu Bandaríkjanna (FBI) og fyrrverandi yfirmaður njósnamála í Bandaríkjunum.



Yfirlýsingar Trump hafa vakið mikla furðu, en talsmenn Hvíta hússins hafa sömuleiðis lýst furðu sinni á því að allir láti eins og Trump skáldað þessar ásakanir. Þess í stað hafi hann verið að vísa til umfjöllunar fjölmiðla.

Einn af talsmönnum Hvíta hússins hefur sent fjölmiðlum fimm greinar frá BBC, HeatStreet, New York Times, The National Review og Fox News. Þessum greinum er ætlað að styðja mál forsetans.

Líklegast þykir þó að Trump hafi verið að vísa til umfjöllunar á Breitbart um meinta „valdaránstilraun“ Obama sem birtist á föstudagskvöldið. Einn helsti ráðgjafi Trump, Stephen Bannon, var áður ritstjóri Breitbart.

Sjá einnig: Úr gullsölu í World of Warcraft í Hvíta húsið

Sú umfjöllun byggði á ummælum þáttastjórnandans Mark Levin í þætti sínum The Mark Levin Show á fimmtudaginn. Í þættinum sagði Levin að Obama hefði notað forsetaembættið til að hlera síma Trump.

Hvorki í útvarpinu né á Breitbart var vísað í nokkrar sannanir. Breitbart vísaði þó í grein hægri-miðilsins HeatStreet frá því í nóvember. Sú grein fjallar um að FBI hafi haft starfsmenn framboðs Trump til rannsóknar vegna mögulegra tengsla þeirra við yfirvöld í Rússlandi. Þá hafi meint hlerun snúið að vefþjóni og tveimur rússneskum bönkum en ekki símum.

Greinarnar styðja forsetann ekki

Nokkrir fjölmiðlar hafa skoðað greinarnar sem Hvíta húsið vísaði í og farið yfir málið. Þar má meðal annars nefna Washington Post og Politifact.

Flestir eru þeir á einu máli. Flestar greinana sem vísað er til tengjast málinu lítið og þær sem tengjast því fjalla ekki um að Obama hafi fyrirskipað hleranir á Trump. Þar að auki hafi þær ekki verið staðfestar.

Auk þess getur forseti Bandaríkjanna ekki löglega fyrirskipað hleranir á ríkisborgara Bandaríkjanna. Eina leiðin til að gera það löglega liggur í gegnum Dómsmálaráðuneytið og dómara.

Þá bendir Washington Post, á kaldhæðnina í því að ríkisstjórn Donald Trump noti „falskar-fréttir New York Times“ til að styðja mál sitt og þá sérstaklega grein sem byggir á nafnlausum heimildarmönnum. Trump sagði nýverið að greinar sem byggi á slíku séu lygar.

Þetta er langt frá því að vera í fyrsta sinn sem Trump heldur einhverju fram á Twitter, án þess að færa nokkrar sannanir fyrir því. Sem dæmi má nefna að eftir að í ljós kom að hann hlaut færri atkvæði í forsetakosningum en Hillary Clinton, hefur hann ítrekað haldið því fram að milljónir hafi kosið ólöglega og þau hafi öll kosið Clinton.

Þá þykir ólíklegt að þetta verði í síðasta sinn sem forsetinn veldur usla með tístum.

Donald Trump Forsetakosningar í Bandaríkjunum

Mest lesið


Fleiri fréttir

Sjá meira


×

Mest lesið